قوم إطمن على حدودك
بقلم - أيمن بحر
جسمك هو البيت اللي بتسكُن فيه نفسك و روحك و نفسك هي البيت اللي بتسكُن فيه مشاعرك و أفكارك و دوافع سلوكك و زي ما فيه لجسمك حُرمه في بردو لنفسك حُرمه
بمعني من حقك محدّش يقرّب من حدودك النّفسيه بدون إستئذان من حقك محدش يقتحمك أو يخترقك أو يستحوذ عليك بدون إستئذان من حقك تحدد المساحه النّفسيه بينك و بين أي حد من حقك تقرّب اللي ترتاحلُه و تطمن ليه و من حقك تمنع اللي متتطمنش ليه إنُّه يقرّب من حقك تسمح لحد إنُّه يقرّب أكتر و تفتحلُه الباب و يدخل البيت و من حقك تحُط سور فاصل و سياج منيع بينك و بين حد أي تاني حتّي جوه بيتك النّفسي في ناس بتقعدّهُم في الصّاله أو الأنتريه و في ناس بتعزمّهُم على الأكل و بتدخّلهُم أوضة السُّفره و في ناس تانيه بتسمحلهُم يتحركوا في البيت براحتهُم و كأنهُم أصحاب مكان
- ليه بقى كُل ده علشان في ناس هوايتها الإقتحام ... إقتحام الأخرين يقرب منك ، و يقرب أكتر فيلاقيك فاتح حدودك فيدخُل و يتجول و يحس إن المكان مكانُه فيُقعُد و يبدأ بإستهلاك مشاعرك فيخليك تحزن مكانُه و تتألم بدالُه و تشيل همومُه بالنيابه عنُه ، و بعدين يبدأ في إنهاك أفكارك فتحتار في مشاكلُه و تردد في قراراتُه وتعاني في كُل خطوه هو بيخطّيها وبعد شويه كمان يبدأ في توجيه تصرُفاتك لحسابُه ورسم سلوكك لصالحُه وإنسي بقى ... إنسى نفسك
- فيه كمان ناس بتحترف الإستحواذ يعني يحب يمتلك الأخر و يحتل أرضُه يبقى عايزك موجود و مُتاح ليه طول الوقت يبقى عايز يستحوذ على إنتباهك وإهتمامك وتفكيرك ومشاعرك وبعد شويه حياتك يعني بيبقى عايزك تعيش لُه مش لنفسك
- كمان في ناس عاملين زي مصّاص الدماء يعني يبقوا عايزين يمصوا دمك يبقوا عايزين ياخدوا منك كُل اللي يقدروا ياخدوه تبقى إنت صاحب العطاء الدّائم الذي لا ينقطع تدي وتدي وتدي فتنزف وتنزف وتنزف تحب وتقبل وتسامح وتسمع و تفهم وتقدر وتُعذُر وتستحمل وتقطع من نفسك كُل يوم حتّه تقدمها قُربان ليهُم تدفع كُل يوم تمن غالي في سبيل رضاهُم ومش بيشبعوا ولا هيشبعوا أبداً
- في ناس بقى و دول أخطر من الجّميع بيدوّبوا الحدود ويزيلوا الفواصل لغاية ما إنت متبقاش عارف فين حدودك من حدودهُم فين الخط الفاصل بينك وبينهُم فين إنت وفين هُما تتوه جوُاهُم أو يتوهوا جوّاك متعرفش اللي إنت حاسُّه ده تبعك و لا تبعهُم اللي شايفُه ده بعيونك ولا بعيونهُم اللي جوّاك ده بتاعك ولا إترمى فيك من عندهُم تتلخبظ تحتار و بعدين تضيع
- و علي النقيض في ناس بيبقوا واقفين على الحدود مستنيبن الإذن مستنيين الإشاره الخضرا مُنتظرين تفتح الباب ناس رايحه جايه تحوم حواليك كُل أملها إنك تاخُد بالك منهُم
و في ناس بقى واقفه بعيد ... بعيد جداً مش عارفه تقرب ولا تبعد
- قوم بقى إطمن على حدودك راجع المسافات بينك و بين الناس شوف مين موجود وموجود فين شوف مين قرب ومين قرب قوي مين قرب لدرجه الخطر و مين مُقتحم ومين مستحوذ ومين مُحتل ومين بيمُص الدم
قوم إعمل التعديلات اللازمه وحُط كُل واحد في مكانُه الأصلي متقربش حد من حدودك أكتر من أللازم ، خلّي في بينك وبينهُم فواصل تدي لكُل واحد على قد قيمتُه
- نقول تاني من حقك تحدد مين هيكون فين و إمتي مُهم حدودك تبقى واضحه وأرضك تبقى أمنه ومُهم إنك تدافع عنها وتحميها ضد أي أذى من أي نوع تحديد المسافه بينك وبين أي حد حق أصيل ليك زي ما هو حق أصيل لكُل النّاس بيتك النّفسي ملكك مش ملك أي حد تاني حافظ عليه لأنُه أمانه ..!
