مبدئيا كده انسوا كل الكلام اللي عرفتوه قبل كده عن قصر البارون علشان اللي هتعرفوه دلوقتى هو الكلام الصحيح
المليونير البلچيكى إدوارد لويس جوزيف إمبان مهندس عبقري وصاحب عقلية إقتصادية فذة اشتغل هو وأخوه الكبير فرنسوا إمبان فى مجال صناعة السكك الحديدية وشركتهم هى اللي نفذت مترو باريس واللى بسببه حصل إدوارد على لقب بارون من رئيس فرنسا سنة ١٩٠٧
وبسبب مشروعاتهم الضخمة وإعتمادهم على البنوك فى تمويلها قرروا ينشئوا بنك خاص بيهم ( بنك إمبان ) واللي بقي بعد كده ( بنك الصناعة البلچيكى ) وتوسعت شركتهم فى إنتاج خطوط الترام فى العالم كله فراحوا عاملين شركة كهرباء علشان توفر الكهرباء لخطوط الترام دى
إدوار كان بيعشق السفر والترحال وإنطلق بفلوسه التى لا تعد ولا تحصى ولف العالم كله ولكنه عشق الهند وعاش فيها فترة طويلة وفى ١٩٠٤ جاء البارون لمصر علشان يقدم عرض إنشاء خط سكة حديد يربط بين المنصورة والمطرية وعلى الرغم من ان شركته مفازتش بالمشروع إلا ان البارون عشق مصر وقرر يعيش فيها باقى عمره ووصى انه يدفن فيها حتى لو مات براها .
نيجى بقى لقصر البارون وحكاياته
البارون إمبان إختار مكان فى الصحراء شرق القاهرة وعرض على الحكومة المصرية فكرة إنشاء حى فى المنطقة دى وسماها هليوبوليس وإشترى البارون ٢٥ فدان سعر الفدان جنيه واحد وده كان مبلغ كبير وقتها على صحراء ملهاش أى ملامح
البارون كان عاوز يعمل حى يكون قطعة من أوروبا يجمع فيه الطبقة الأرستقراطية والجاليات الأجنبية وبالذات البلچيكيين المقيمين فى القاهرة
طبعا المنطقة مكانش فيها مرافق ولا مواصلات ولا أى خدمات ، فالبارون علشان يجذب الناس للحى بتاعه فكر فى إنشاء ٣ خطوط مترو تربط الحى بالقاهرة
وبدأ فى إنشاء البنية التحتية للمنطقة وعمل ملاعب جولف ومضامير سباق الخيل ومنتجعات صحية ومساكن راقية للإيجار .
وإختار البارون أعلى هضبة فى الحى بتاعه علشان يبنى عليها أسطورته المعمارية الفريدة ( قصر البارون )
إشترى البارون تصميم قصره من معرض الفنان الفرنسي ألكسندر مارسيل وكان خليط ما بين العمارة الأوروبية والهندية ( مثل معبد أنكور وآت الكمبودى ومعبد أوريسا الهندوسى ) .
واللى قام بزخرفة القصر چورچ لويس كلود وإستمر بناء القصر اللى كان على مساحة ١٢.٥٠٠ متر مربع خمس سنوات .
قصر البارون هو القصر الوحيد فى العالم الذى لا تغيب عنه الشمس طول اليوم ويقال أن برج القصر مبنى على قاعدة خرسانية على ( رمان بلى ) بتخليه يدور دورة كاملة كل ساعة
القصر كان يضم تحف وتماثيل نادرة جدا من الدهب والبلاتين والبرونز كان جايبها البارون من الهند وكان فى ساعة أثرية قديمة ملهاش مثيل إلا فى قصر باكنغهام فى لندن بتوضح الوقت بالقائق والساعات والأيام والشهور والسنين ودرجات الحرارة وتقلبات وجه القمر .
أرضية القصر كانت من الرخام والمرمر الأصلى كان مستورد من إيطاليا وبلچيكا ، أما الغرف كانت باركيه والقصر كان فى اتنين أسانسير واحد للطعام والتانى لأسرة البارون ده غير نظام التدفئة المركزية ، وحديقة القصر كانت فيها زهور ونباتات نادرة جدا جابها البارون من كل حتة فى العالم .
أما بدروم القصر كان قصر تانى تحت الأرض وكان فى سرداب بيوصل لكنيسة البازيليك اللى بناها واندفن فيها البارون ده غير الغرفة الوردية ( صاحبة القصص والأساطير )
وفى إفتتاح القصر سنة ١٩١١ البارون عمل حفل أسطورى ودعا فيه علية القوم وكان على رأسهم صديقه ( الأمير حسين كامل ) اللى انبهر لما طلع برج القصر ولقا نفسه شايف القاهرة وأهرامات الجيزة أدامه فإتملكته الغيرة ان فى قصر أعلى وأجمل من قصره ولمح للبارون أنه يهديه القصر .
